Казан һәм Яр Чаллы халкы җирле хакимият эшен югары бәялиләр

Россия Федерациясе Хөкүмәте каршындагы Финанс университеты «Россия шәһәрләрендә тормыш сыйфаты» проекты кысаларында шәһәр хакимиятен халык ничек кабул итүен бәяләде. Тикшеренүләр нигезенә 2017 елның ноябрь – декабрендә уздырылган сораштырып-белешүләр нәтиҗәләре ятты. Казан рейтингта тугызынчы урынны алды, Чаллы, Уфаны алга уздырып, 15нче позицияне биләде.
Алынган нәтиҗәләргә караганда, бүген халыкның яртысыннан күбрәге (52%) җирле хакимият шәһәрләрнең иминлеге һәм уңайлыгы өчен күп нәрсәләр эшли, дип уйлый. Икенче яктан, респондентларның күпчелеге җирле үзидарә органнарына йогынты ясау мөмкинлекләре җитми, дигән фикердә. Ә социаль һәм коммуналь хезмәтләр вәкилләренә, чиновникларга ришвәт бирмәүчеләр элеккечә үк күп.