Борын төбендә – ягып җылыту чоры

Бүген ТР Хөкүмәте йортында Президент Рөстәм Миңнеханов катнашында ягулык-энергетика һәм торак-хуҗалык комплексларының 2012-2013 елларда ягып җылыту сезоннарында эшләүләренә йомгак ясалды һәм алдагы  сезонга әзерләнү бурычлары билгеләнде. ТР Премьер-министры Илдар Халиков җитәкчелегендә барган бу сөйләшүдә ТР муниципаль берәмлекләр Советы Рәисе Минсәгыйть Шакиров та катнашты.
Илдар Халиков искәрткәнчә, ягу-җылыту сезонына әзерлек 15 сентябрьгә тәмамланырга тиеш. Бу көнгә әзерлек актларының бөтенесе дә имзаланган булуы зарур. Бу эш өчен оешма җитәкчеләренә шәхси җаваплылык йөкләнә. 2012-2013 еллардагы ягу чорына 173 муниципаль берәмлегенең 73-еннән генә әзерлек актлары кергән иде.  21 берәмлектәге 100 оешмадан әзерлек актлары кереп өлгермәгән иде. Хөкүмәт җитәкчесенең фикеренчә,социаль сферадагы объектларны әзерләүгә аерым игътибар итәргә кирәк. Шул ук вакытта энергия кулланган өчен бурычларны да каплау бик әһәмиятле.