Миллионер авыллар

ТР муниципаль  берәмлекләр Советы авыл җирлекләрендә ел саен үткәрелә торган грантлар конкурсына заявкалар җыя.

Конкурста алга чыкан 104 авыл җирлеге 1-әр милллион сум отышка лаек булачак.

Исегезгә төшерәбез,бу конкурс ТР муниципаль берәмлекләр Советы инициативасы hәм Президент яклавы белән 2013 елдан алып барыла.Аның максаты-республика муниципалитетларын социаль-икътисади үсешкә hәм кешеләрнең тормыш дәрәҗәләрен күтәрүгә юнәлдерү.Шул ук вакытта ул  җирле мәсьәләләрне чишүдә яңа ресурслар табуны да хәл итә.

Җирле үзидарә органнарының эш нәтиҗәләре 7 күрсәткеч аша бәяләнә. Шулар исәбендә-авыл җирлегенең салымлы hәм салымлы булмаган доходлары,100 кеше санына кече hәм урта кәсәбәчелек субъектлары исәбе,мөгезле эре терлек саны,җирлектә бер кеше исәбенә сафка керткән  торак йортлар күләме hәм башкалар. Грантлар саны муниципаль район җирлекләрендә яшәгән халык саны белән дә чикләнә.Әгәр райондагы авыл җирлекләрендә 22 мең кеше яшәсә,ул район 2 грантка исәп тота ала. Әгәр күрсәткеч югарырак булса,өч грантка өмет итәргә була.

Җирлекләрне конкурста күбрәк катнаштыру нияте белән кагыйдә буенча бер җирлек җиңгәннән соң,алдагы өч елда ул конкурска кертелми.

Ике елда конкурста 43 районнан 443 җирлек катнашып,208 җирлек җиңүче дип табылды.Аларга 1-әр миллион сумлык грант бирелде.

Бу акчалар авыллар арасында юлларны төзәтергә,урыннарда су белән тәэмин итүне яхшыртырга,авыл җирлекләрен төзекләндерүгә ярдәмгә техника сатып алуга hәм башка әhәмиятле гамәлләргә тотылды.