Файдалы очрашу

ТР муниципаль берәмлекләр Советы Рәисе Минсәгыйть Шакиров бүген Кырымнан Казанга килгән бер төркем дәүләт хакимияте hәм Кырымның  муниципаль берәмлекләр хезмәткәрләре белән очрашты. Алар Татарстан Президенты hәм Хөкүмәте булышлыгы белән Икътисад,идарә hәм хокук институтында (ИЭУП) читтән торып укыйлар. Алар арасында – уку-укыту проекты кураторы,Алушта шәhәре башлыгы урынбасары Әнвәр Арпатлы,Кырымның Ленин районы администрациясе башлыгы урынбасары Эдем  Мәhдиев,Кырымның милләтләр буенча дәүләт комитеты баш белгече Дамир Якупов hәм башкалар бар иде.

Минсәгыйть Шакиров кунакларны кыскача җирле үзидарәнең Татарстан моделе белән hәм ТР муниципаль берәмлекләр Советы эшчәнлеге белән таныштырды.

“Республикада җирле үзидарә 2006 елдан бирле генә эшләсә дә,бездә бу өлкәдә шактый бай тәҗрибә тупланды,җирле үзидарәнең хокук базасы булдырылды.Җирле үзидарә үсешенең төрле аспектларын чишүнең аерым алымнары,алга баруның үз үзенчәлекләре билгеләнде”,-диде М. Шакиров.

Әңгәмә барышында Россиядә үзидарә үсешенең төрле мәсьәләләре буенча фикер алышынды.

Исегезгә төшерәбез,Кырым Россия составына кергәннән соң,биредә яңа кадрлар әзерләү,шул исәптән, идарә хезмәтендә эшләрне Россия законнарына туры китереп алып барырлык кешеләр кирәклеге ачыкланды. Шуны исәпләп,Кырымның 50 чиновнигын,үзидарә хезмәткәрләрен,иҗтимагый эшлеклеләрне Казанда читтән торып укыту проекты туды. Институтта аларга икътисад,менежмент,маркетинг дәресләре бирәләр.Хәтта инглиз теленә дә өйрәтәләр,Россия тарихы дәресләре бирәләр. Дәресләрне теоретиклар да,практиклар да алып бара.Аларның күбесе Татарстанның эре чиовниклары,белгечләре. Белемнәрне күтәрү белән бергә,мәдәнияттән дә әйбәт дәресләр узу каралган.